Приговор царской о кормлениях и о службе. Лета 7064-го (1556) приговорил царь и великий князь Иван Васильевич всеа Русии з братиею и з боляры о кормлениях и о службе всем людем, как им впредь служити. А по се время бояре и князи и дети боярскые сидели по кормлениям по городом и по волостем для росправы людем и всякого устроениа землям и собе от служеб для покою и прекормления; на которых городех и волостех были в кои лета наместникы и волостели, и тем городом и волостем розсправу и устрой делали и от всякого их лиха отбращали на благое, а сами были доволны оброкы своими и пошлинами указными, что им государь уложил.
     И внииде в слух благочестивому царю, что многие грады и волости пусты учинили наместникы и волостели, изо многих лет презрев страх божий и государьскые уставы, и много злокозненных дел на них учиниша; не быша им пастыри и учители, но сътворишася им гонители и разорители. Такоже тех градов и волостей мужичья многие коварства содеяша и убийства их людем: и как едут с кормлений, и мужики многими искы отъискивают; и много в том кровопролития и освернениа душам содеяша, их же не подобает в христанском законе не слышати; и многие наместникы и волостели и старого своего стяжениа избыша, животов и вотчин.<…>
     О повелении царьском. И повеле государь во градех и в волостях разчинити старосты, и сотцкые, и пятьдесятцкые, и десятцкые и з страшным и грозным запрещением заповедь положити, чтоб им разсужати промежь разбои и татбы и всякие дела, отнюдь бы никотора вражда не именовалася, также ни мзда неправедная, ни лжывое послушество; а кого промеж собою такова лиха найдут, таковых велел казнем предавати; а на грады и на волости положити оброкы по их промыслом и по землям, и те оброкы збирати к царьскым казнам своим диаком; бояр же и велмож и всех воинов устроил кормлением, праведными урокы, ему же достоит по отечеству и по дородству, а городовых в четвёртой год, а иных в третей год денежьным жалованием.
     О рассмотрении государьском. По сем же государь и сея рассмотри: которые велможи и всякие воины многыми землями завладали, службою оскудеша,- не против государева жалования и своих вотчин служба их - государь же им уровнения творяше: в поместьях землемерие им учиниша, комуждо что достойно, так устроища, преизлишки же разделища неимущим; а с вотчин и с поместья уложеную службу учини же: со ста четвертей добрые угожей земли человек на коне и в доспесе в полном, а в далной поход о дву конь; и хто послужит по земли, и государь их жалует своим жалованием, кормлении, и на уложеные люди даёт денежное жалование; а хто землю держит, а службы с неё не платит, на тех на самех имати денги за люди; а хто даёт в службу люди лишние перед землёю, через уложенные люди, и тем от государя болшее жалование самим, а людем их перед уложенными и полътретиа давати денгами. И все, государь, строяще, как бы строение воинъству и служба бы царская безо лжи была и без греха вправду; и подлинные тому розряды у царьскых чиноначалников, у приказных людей.

Хрестоматия по истории России с древнейших времён до наших дней.
Авторы -составители: А.С. Орлов, В.А. Георгиев, Н.Г. Георгиева, Т.А. Сивохина.- М.,1999. С.121 - 122